काठमाडौं । देशभर निरन्तर भइरहेको अत्यधिक वर्षाका कारण पृथ्वी राजमार्गअन्तर्गत नागढुंगा क्षेत्रमा यात्रा जोखिमपूर्ण बनेपछि सुरक्षा व्यवस्थापनलाई मध्यनजर गर्दै आज रातिदेखि नागढुंगा नाकाबाट सबै प्रकारका सवारीसाधन सञ्चालनमा रोक लगाइएको छ।
सम्बन्धित सुरक्षा निकायका अनुसार निरन्तरको वर्षासँगै सडक चिप्लिने, पहिरो खस्ने तथा अन्य प्राकृतिक विपद्को जोखिम उच्च भएकाले यात्रु तथा सवारी चालकको सुरक्षालाई पहिलो प्राथमिकतामा राख्दै उक्त निर्णय गरिएको हो।
यस अवधिमा नागढुंगा नाका हुँदै कुनै पनि प्रकारका सार्वजनिक तथा निजी सवारीसाधन सञ्चालन गर्न नपाइने जनाइएको छ। यात्रु तथा सवारी चालकहरूलाई अत्यावश्यक बाहेक यात्रा नगर्न, वैकल्पिक व्यवस्था मिलाउन तथा सम्बन्धित निकायबाट अर्को सूचना जारी नभएसम्म उक्त मार्ग प्रयोग नगर्न आग्रह गरिएको छ।
सुरक्षा निकायले मौसम तथा सडक अवस्थाको निरन्तर अनुगमन भइरहेको जनाएको छ। सडक सुरक्षित भएको पुष्टि भएपछि मात्र सवारी आवागमन पुनः सञ्चालन सम्बन्धी अर्को सूचना जारी गरिने बताइएको छ।
यात्रु तथा सवारी चालकहरूलाई आधिकारिक सूचना र सुरक्षा निकायको निर्देशनको पूर्ण पालना गर्न अनुरोध गरिएको छ।
